Hai anos que a Asociación veciñal, cultural, deportiva e recreativa do barrio da Agra do Orzán dentro do programa “Facendo país” coordinado por Ricardo Seixo, vén desenvolvendo “Gosto de vivir a poesía”, unha actividade aberta e de balde, en que as persoas participantes escollen catro ou cinco autoras/es a quen dedicar cadansúa sesión ao longo do ano; escolman uns poemas de cada autor/a e, nunha sorte de escola de declamación, trabállanos durante un mes para facer unha lectura pública final, no local veciñal (rúa Entrepenas 38 soto, 15010 A Coruña) ou noutras localizacións como parte doutras actividades propias, alleas ou no decurso dos festivais que desenvolvemos no Centro Ágora.

Por mor da pandemia, introducimos a publicación en facebook e youtube.

A lectura dos poemas compleméntase, en colaboración coa Asociación de Escritoras e Escritores en Lingua Galega (AELG), cunha introdución sobre a figura e obra do autor/a, coa presenza do autor/a ou ao coidado dunha persoa coñecedora da súa obra.

En 2021 temos programados cinco encontros:

• Marzo. Miguel González Garcés
• Maio: Xela Arias: dentro do festival “Ferrados de Letras”, no Centro sociocultural Ágora
• Xulho: Ricardo Carvalho Calero
• Outubro: Antón Avilés de Taramancos
• Decembro: un acto no Centro sociocultural Ágora coa presenza de Ana Romaní, Eva Veiga e Xulio López Valcárcel

Agradecemos a Xoán Andrade e a Bruno L. Teixeiro que nos permitisen utilizar a caricatura e o desenho de Ricardo Carvalho Calero para o desenho de dous dos marcapáxinas que editamos en 2020.