O festival A fonética dos corpos de 2021, do programa “Agra no Ágora” en que colaboramos co Concello da Coruña, ofrécenos dous espectáculos teatrais, un amador e outro profesional.

Por unha banda, tres participantes do grupo de teatro interxeracional da asociación veciñal Agra, Flor del Pópolo, Javi Tink e Pepe Rodríguez, representan Roteiro: na vida imos polo noso camiño, e tarde ou cedo eliximos que sendeiro seguir até acabar creando o noso propio roteiro, reflexionando sobre as diferenzas e similitudes entre unha xeración e outra, dous netos e o seu avó rin, lembran e debaten nas horas previas do novo percorrido do maior dos irmáns.

E a continuación, Falar sen cancelas

Hai xente que fala por falar. Outros falan polos cóbados. Algúns falan os sete falares. E non son poucos os que falan do xato e se esquecen do trato. Porque prefiren falar dos biosbardos, das nubes ou do sexo dos anxos antes que ir ao conto. Laretar, latricar, esbardallar -mesturando o allo co bugallo e sen querer quitarlle lobos ao asunto- é unha arte que, se se manexa ben, dá xenio escoitar. En definitiva, que o falar non ten cancelas, sobre todo nun lugar en que cada palabra conta, ás veces por dúas, no que o dobre significado abrolla en cada xiro da lingua e a retranca fai rimar humor con historia cada vez que alguén abre a boca. Somos un pobo de contos, de lendas, de relatos. Sabemos falar. E cando falamos, falamos ben. Porque temos, igual que acontece coa choiva, mil e unha maneiras de describir as nosas formas de conversar. Culturactiva S. Coop. Galega produce, deste xeito, Falar sen cancelas, un espectáculo con tres referentes da comedia galega, que o público coñece ben e a profesión respecta: Pedro Brandariz, Fran Rei e Isabel Risco, que logo de 15 anos xuntos sobre os escenarios, continúan con esta peza na que intercalarán sketches, gags, xogos de improvisación e diálogos que farán de cada representación unha aventura diferente e única. Unha gran radiografía da galeguidade, coa palabra como gran protagonista, mais tamén o clown e a improvisación.

https://www.culturactiva.org/gl/espectaculo/falar-sen-cancelas

A quen vai dirixido:

Público adulto

Cando:

14/10/2021

Horario:

20.00 h

* Ás 19:30 h. abrirá a porta. Pídese presentarse no auditorio con antelación suficiente para que o persoal encargado asigne os asentos.

Duración:

Roteiro: 30 minutos

Falar sen cancelas: 75 minutos

Enderezo:

Auditorio do Centro Sociocultural Ágora. Lugar Agramela 17. 15010 A Coruña

Número de prazas:

250 (esta cifra pode variar en función das limitacións preventivas contra a pandemia COVID).

Os asentos adxudicaranse por orde de chegada. As portas abren ás 19:30 h.

Prezo:

de balde

Requisitos:

Será de OBRIGADO cumprimento:

• O uso de máscara (excepto aquelas persoas exentas pola lexislación vixente).

• Lavar as mans con xel hidroalcohólico á entrada e á saída do edificio.

• O uso da butaca asignada polo persoal da sala. Non está permitido o desprazamento, salvo que o persoal da sala o autorice.

• Manter a distancia de seguridade, sobre todo á entrada e á saída para evitar aglomeracións.

• Respectar a sinalización.

• Seguir en todo momento as indicacións do persoal da sala.

RECOMÉNDASE:

• Limitar o máximo posible o uso dos aseos.

• Actuar con responsabilidade.

• Organizadora:

Asociación veciñal, cultural, deportiva e recreativa do barrio da Agra do Orzán “Agra”

Contacto:

agra@galizacultura.gal