ASOCIACIÓNS

Estrea do audiovisual “Nós de onte a hoxe” e visita guiada pola exposición

  • Publicado por gzcultura
  • En Xaneiro 4, 2020
  • 0 Comentarios

A Federación de Asociacións Culturais Galegas “Galiza Cultura” e a Agrupación Cultural O Galo, integrante da mesma, presentan no Salón de Actos do Museo do Pobo Galego este venres 10 de xaneiro ás 18 horas o audiovisual Nós de onte a hoxe, antes da visita guiada pola exposición adicada a Xeración Nós inaugurada o pasado 11 de decembro.

O audiovisual é unha curta documental que percorre a Xeración Nós e a súa significación para a nosa cultura, foi dirixido pola cineasta Sara Riobó Rúa e incorpora entre outros a interpretación de partituras de José Baldomir -músico da Xeración Nós-; ten unha duración de catro minutos e medio.

Cartaz do evento

Despois da presentación do audiovisual comezará unha visita guiada pola exposición dirixida por Carlos Bernárdez, comisario da exposición, que conta con pezas orixinais cedidas pola Fundación Vicente Risco e polo propio comisario.

O audiovisual forma parte da serie de actividades programadas por Galiza Cultura para conmemorar o centenario dunha iniciativa singular e decisiva na historia contemporánea da Galiza: o nacemento da revista Nós, cuxo primeiro número ve a luz o 30 de Outubro de 1920, revista de alta cultura que coloca a lingua, as artes e a ciencia galega nun nivel privilexiado de calidade.

A vindeira actividade será unha conferencia na vindeira semana en Compostela; a exposición e o audiovisual están financiadas pola Deputación da Coruña por medio dunha convocatoria competitiva de axudas de concorrencia competitiva.

0 Comentarios

Leave Reply

O teu enderezo electrónico non se publicará Os campos obrigatorios están marcados con *