A Asociación Veciñal Agra distribúe o almanaque “2021 Parque da Agra xa!” entre os grupos municipais e concellarías
- Posted by gzcultura
- On 07/01/2021
- 1 Comments
A Asociación Veciñal Agra distribúe o almanaque “2021 Parque da Agra xa!” entre os grupos municipais e concellarías para lembrarlles todos os días do ano a urxencia de habilitar unha zona verde para o barrio da Agra do Orzán. O calendario está ilustrado cunha multitude de rostros que mostran na máscara o lema “Parque da Agra xa!”.
Segundo a presidenta da Asociación veciñal Agra, María Gutiérrez Calvete: “A pandemia da COVID-19 evidenciou a necesidade urxente dunha zona verde no barrio da Agra; durante o confinamento, debería terse impulsado, non paralizado, a negociación entre o Concello da Coruña e o MITECO por cada centímetro de terreo onde poder plantarmos unha árbore.”
O lanzamento do globo da AEMET salvagardou do ladrillo o único terreo público onde aínda poder ter unha zona verde. “Cando soubemos que automatizaran este labor, visitamos o Observatorio e nos informaron de que unha parte do xardín e dous almacéns quedaran sen uso”. Esta nova situación causa temor e ilusión a un tempo: a marcha do globo abrirá a canceliña a un xardín público ou ao ladrillo?”. A Asociación veciñal Agra propón que se habilite canto antes o acceso público a esta zona verde: “semella doado substituír o valado da Canceliña por un sebe de loureiros e abrir un xardín dunha superficie semellante á da praza das Cunchiñas, coa vantaxe de que é de terra e pode ser habitada con árbores autóctonas (carballos, castiñeiros, acivros ramificados dende o pé, pradairos etc); os almacéns poderían habilitarse como servizos públicos e área cuberta para actividades colectivas”. Por outra banda, debería limitarse e protexerse a área dos instrumentos de medición e, mesmo, abrir o acceso rodado ao Observatorio pola rúa Páramo. “Gustaríanos que se mantivese a actividade do Observatorio porque é unha honra que un centro técnico e de investigación deste calibre estea no noso barrio”.
Na última semana de 2020 a prensa informou de que as negociacións se paralizaran dende que se declarou o estado de emerxencia. María Gutiérrez pregunta: “Como se pode xustificar ese abandono? Non era posible continuar con esa negociación cos medios telemáticos de que dispoñen ambas as institucións?”. O BNG informou á asociación veciñal Agra de que presentou unha pregunta e unha proposición non de lei que no Congreso, ademais dun rogo no Concello, para instar a devandita negociación. “Non sabemos se os outros grupos fixeron algo neste sentido en 2020; o concelleiro de Urbanismo acaba de comunicarnos a súa intención de retomar a negociación este ano. Oxalá en 2021 haxa máis colaboración e resultados positivos!”, expresa con optimismo a presidenta da asociación veciñal Agra.
1 Comment