Charla de Ramón Veras Castro, médico de familia.

Preocúpannos os tempos de espera na sanidade, no plano individual que teñamos algún problema e non se nos atenda ben e nos tempos necesarios para facelo, pero, sendo isto lóxico e moi real, é certo que as estratexias de mellora da saúde máis eficientes e útiles están en gran parte fóra do sistema sanitario.

É clásico o estudo de Dever (1976), no que se demostra que a modificación dos estilos de vida e o coidado do medio ambiente beneficiaríanos máis que todo o gasto que facemos no sistema sanitario.

No 2008 a OMS publicou por primeira vez un estudo onde se demostraba o impacto dos determinantes sociais da saúde, isto é, o que se relaciona coa nosa vida: onde nacemos e crecemos, a educación, o traballo, as relacións sociais e o medio onde vivimos.

Na palestra repasarase esta estratexia de saúde e o que afecta ao sistema sanitario: listas de agarda, privatización, relación profesional dentro do sistema e a nova cultura profesional, o consumo sanitario e a necesidade de promoción de saúde e de participación social no servizo sanitario.

Será a primeira palestra de actualidade do programa Agra no Ágora 2026, en que colaboramos co Concello da Coruña. Como todas as actividades deste programa, son de entrada libre e gratuíta.