A nova edición do festival “A fonética dos corpos”, que conforma o programa Agra no Ágora, tráenos ao barrio da Agra este espectáculo de Producións Teatrais Excéntricas en coprodución co Centro Dramático Galego. Con este proxecto Excéntricas gañou o III concurso de proxectos que convoca a Fundación Manuel María e que recibe o apoio de mais de corenta concellos e institucións de Galiza.

O espectáculo é protagonizado por un luxoso elenco: Rocio González, Victor Mosqueira, Marcos Orsi e Patricia Vázquez, que xa teñen conformado compañía en anteriores proxectos de Excéntricas.

“O Auto do Castromil” está feita con anacos das obras de Manuel María: “A rebelión dos baús”, “O auto dos semulados da Caravilla”, “Unha vez foi o trebón”, “Abril de lume e ferro” e o “Entremés da OTAN”

A obra acontece nunha viaxe onírica abordo dun coche de liña. Os viaxeiros dormen e talvez o conductor. As maletas e demais bagaxes amotínanse, cobran vida e repasan unha curiosa historia de Galiza, combaten a nosa amnesia conxénita usando autos populares e farsas do autor chairego. Nelas aparece a historia alucinada dun pobo que loita, é derrotado, volve levantar a cabeza e rebelarse de novo. Unha rebelión na que, ás veces, non temos mais armas que o humor e o espirito antroidesco. O auto do Castromil é unha viaxe en transporte público pola Galiza inconsciente.

Ficha Artística e Técnica

• Elenco Rocío González. Víctor Mosqueira, Marcos Orsi e Patricia Vázquez
• Autor: Manuel María
• Escenografía e Indumentaria: Carlos Alonso
• Iluminación: Octavio Mas
• Música: Piti Sanz
• Atrezzo: Kukas Producións Artísticas
• Noticieiro Cinematográfico: Marcos PTT
• Fotografía: Sabela Eiriz
• Deseño Gráfico: Milicia Gráfica
• Técnicos en xira: Javier Gey e Pepe Quintela
• Axudante de Dirección: Mon Serodio
• Xefe de Produción: Rubén G. Pedrero
• Dirección e Dramaturxia: Quico Cadaval
• Duración: 70 minutos

Este festival, como todas as actividades do programa “Agra no Ágora” son de acceso libre e gratuíto; o programa está financiado polo Concello da Coruña e deseñado en colaboración coa Asociación veciñal Agra

A quen vai dirixido: público en xeral

Cando: xoves 17 de outubro ás 20:15 h.

Onde: Auditorio do Centro Sociocultural Ágora. Lugar Agramela 17. 15010 A Coruña

Prezo: de balde. Non fai falla retirar billetes nin reserva previa.